काठमाडौँ । खाद्य व्यवस्था तथा व्यापार कम्पनी लिमिटेडले दशैँमा बिक्री नभएका च्याङ्ग्रा लिलाम गर्ने भएको छ । दशैँ–तिहारको लागि भन्दै खरिद गरिएका च्याङ्ग्रा नबिकेपछि थापाथलीस्थित खाद्य व्यवस्था तथा व्यापार कम्पनीले च्याङ्ग्रा लिलामीमा राखेको हो ।
लिलामीका लागी खाद्यले शुक्रबार टेण्डर आह्वान गरेको छ । भाउ घटाउँदा पनि दशैँ–तिहारका लागि खरिद गरिएका च्याङ्ग्रा नबिकेपछि खाद्यले एकमुष्ट लिलामीमा राखेको हो ।
लिलामीमा सहभागी हुन चाहने इजाजतपत्र प्राप्त फर्म, संस्था, कम्पनी वा व्यक्तिले पुस १ गतेसम्म सिलबन्दी दरभाउपत्र पेश गर्नुपर्नेछ । कम्पनीले बोलपत्र धरौटीका लागि ७५ हजार र न्युनतम कबोल दर प्रतिकेजी १ हजार १ सय २५ रुपैयाँ तोकेको छ ।
दशैँ–तिहारमा उपभोक्ताको सहजता र सहुलियत मूल्यमा च्याङ्ग्राको उपलब्धताका लागि खाद्यले च्याङ्ग्रा खरिद गरेको थियो । तर, भाउ घटाउँदा पनि च्याङग्रा बिक्ने स्थिति नदेखेपछि कम्पनीले एकमुष्ट लिलाीम खुलाएको हो । च्याङ्ग्रा मात्र होइन, दशैँ तिहारका लागि भन्दै उत्पादन गरिएका कुखुरा पनि नबिकेपछि अहिले कुखुरा व्यापारीहरु पनि तनावमा परेका छन् । ब्रोइलर कुखुराको मूल्य प्रतिकिलो ७० रुपैयाँ घटाउँदा पनि मासु नबिकेको हो ।
