काठमाडौं । वैदेशिक रोजगारीका लागि अमेरिका पठाईदिन्छु भन्दै रकम ठगी गर्ने व्यक्ति पक्राउ परेका छन् । पक्राउ पर्नेमा कैलाली जिल्ला टिकापुर नगरपालिका वडा नं. १ घर भई हाल काठमाडौं महानगरपालिका वडा नं. ३२ कोटेश्वर बस्ने २८ वर्षीय रमेश न्यौपाने पक्राउ परेका हुन् ।
उनले गणेश अधिकारीलाई वैदेशिक रोजगारीका लागि अमेरिका पठाईदिन्छु, त्यसको लागि प्रतिव्यक्ति ४५ लाख रुपैयाँ लाग्छ भनेका थिए । साथै, अमेरिका पुगेपछि प्रतिष्ठित होटलमा काम लगाईदिने, मासिक ३ लाख रुपैयाँ तलब हुन्छ भनी विश्वास दिलाई प्रलोभनमा पारी पीडितहरुबाट पटकपटक गरी ६४ लाख ४५ हजार रुपैयाँ रकम लिई सम्पर्क विहीन भएका थिए ।
काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले उनलाई मङ्सिर २१ गते नयाँ बानेश्वर शिभिल अस्पतालबाट पक्राउ गरेको हो । पक्राउ परेका न्यौपानेलाई थप अनुसन्धान तथा कारवाहीका लागि वैदेशिक रोजगार विभाग ताहाचल पठाईएको प्रहरीले जनाएको छ ।
