काठमाडौं । कास्कीको भादौरेमा ढिँडो खाने प्रतियोगिता आयोजना हुने भएको छ । भदौरे क्लब र भदौरे आमा समूहको आयोजनामा अन्नपूर्ण गाउँपालिका २, भदौरेमा खुला ढिँडो खाने प्रतियोगिता हुने भएको हो ।
भदौरेमा हुन लागेको २५औं रजत जयन्ती भदौरे पञ्चासे कोदो महोत्सव, ल्होसार मेलामा उक्त प्रतियोगिता हुन लागेको हो । प्रतियोगितामा सबैभन्दा छिटो ढिडो खानेलाई बिजेता घोषणा गरिने अन्नपूर्ण ४ का वडाध्यक्ष आइन्दल गुरुङले बताएका छन् । उनले भने ‘ढिडो खाने प्रतियोगितामा निश्चित ढिडो राखेका हुन्छौं । जसले छिटो खानुहुन्छ । उहाँलाई नै विजेता घोषणा गरिनेछ र विजेतालाई आकर्षक पुरस्कारको व्यवस्था पनि गरिएको छ ।’
महोत्सवमा ढिडो खाने प्रतियोगितासँगै ७ ए साइड फुटबल प्रतियोगिता, खुला नृत्य, छेलो हान्ने, कुर्ची घुमाई, घैटो फुटाई, रसी तान्ने प्रतियोगिता आयोजना गरिएको आयोजकले जनाएको छ । फुटबलतर्फ विजेतालाई १ लाख र उपविजेतालाई ६० हजारसहित ट्रफी प्रदान गरिने भदौरे क्लबका अध्यक्ष अनिलकुमार गुरुङले जानकारी दिए ।
कृषकलाई प्राथमिकता दिई कृषकहरुलाई उत्प्रेरित गराउने उद्देश्यले कोदोलाई प्राथामिकता दिई मेला आयोजना गरिएको अध्यक्ष गुरुङले बताए ।
