काठमाडौं । गरिमा विकास बैंक लिमिटेडले लाभांश वितरण गर्ने घोषणा गरेको छ । बैंकले गत आर्थिक वर्षको मुनाफाबाट आफ्ना सेयरधनीलाई १० प्रतिशत लाभांश वितरण गर्ने घोषणा गरेको हो ।

बैंकको पुष ४ गते बुधबार बसेको संचालक समितिको बैठकले ९.५० प्रतिशत बोनस सेयर र कर प्रयोजनका लागि ०.५० प्रतिशत नगद लाभांश वितरण गर्ने निर्णय गरेको हो । गरिमा विकास बैंकले लाभांश बापत ५१ करोड ८७ लाख ६८ हजार ७०५ रुपैयाँ ७२ पैसा आफ्ना सेयरधनीलाई वितरण गर्नेछ ।

उक्त प्रस्तावित लाभांश नियामक नेपाल राष्ट्र बैंक र बैंकको आगामी साधारणसभाले पारित गरेपछि मात्रै सेयरधनीमा वितरण हुनेछ ।

गत वर्ष भने बैंकले १३ प्रतिशत बोनस सेयर र कर प्रयोजनका लागि १.५० प्रतिशत नगद लाभांश वितरण गरेको थियो । अघिल्लो वर्षको तुलनामा यस वर्ष बैंकले कम लाभांश वितरण गर्ने भएको छ ।