काठमाडौँ । हिमालयन रि–इन्स्योरेन्सले सर्वसाधारणका लागि आईपीओ जारी गरेको छ । कम्पनीले २७ मंसिर (बुधबार)देखि सर्वसाधारणका लागि प्रिमियम मूल्यमा आईपीओ जारी गरेको हो । कम्पनीको आईपीओमा २७ मंसिरदेखि पुष १ गतेसम्म आवेदन दिन सकिनेछ । 

कम्पनीले अंकित मूल्य १०० रुपैयाँमा १०६ रुपैयाँ प्रिमियम थप गरी प्रतिकित्ता २०६ रुपैयाँका दरले आईपीओ जारी गरेको हो । कम्पनीले सर्वसाधारणका लागि २ करोड ४९ लाख कित्ता सेयर निष्कासन गरेको छ । जसमा लगानीकर्ताले न्यूनतम १० कित्तादेखि अधिकतम ३ लाख कित्तासम्म लागि आवेदन दिन सक्नेछन् । आवेदन सिआस्वा सदस्य बैंक तथा वित्तीय संस्था वा मेरो सेयरबाट पनि दिन सकिनेछ । 

बिक्री प्रबन्धक एनएमबि क्यापिटल रहेको उक्त आईपीओ निष्कासनका लागि रेटिङ एजेन्सी इक्रा नेपालले ‘इक्राएनपी आइआर ए’ रेटिङ प्रदान गरेको छ । यसले कम्पनीको दायित्व बहन गर्ने क्षमता पर्याप्त मात्रामा सुरक्षित रहेको जनाउँछ । 

कम्पनीले यसअघि वैदेशिक रोजगारीमा रहेका नेपालीका लागि ३० लाख कित्ता सेयर निष्कासन गरिसकेको छ । जसमध्ये २ प्रतिशत अर्थात ६ लाख कित्ता सेयर कम्पनीका कर्मचारी र ५ प्रतिशत अर्थात १५ लाख कित्ता सेयर सामूहिक लगानी कोषलाई बाँडफाँड भएको छ ।