काठमाडौँ । काठमाडौँ महानगरपालिकाले विद्यार्थीलाई पोशाकबाहेक अन्य पोशाक किन्न बाध्य पार्नेलाई कारवाही गर्ने चेतावनी दिएको छ । अनावश्यक रुपमा विद्यालयहरुले विद्यार्थीलाई विभिन्न पोशाक किन्न लगाएको भन्दै त्यस्ता विद्यालयहरुलाई कारवाही गर्ने चेतावनी दिएको हो ।

चाडपर्वका नाममा विद्यार्थीहरुलाई विभिन्न पोशाक किन्न लगाएको गुनासो बढेपछि त्यस्ता विद्यालयलाई कारवाहीको दायरमा ल्याउन लागेको महानगरले जनाएको छ ।

यसरी विद्यालयहरुले चाडपर्वका नाममा विद्यार्थीहरुलाई विभिन्न पोशाक किन्न बाध्य बनाउन नमिल्ने काठमाडौँ महानगरका शिक्षा अधिकारी सीताराम कोइरालाले बताएका छन् । ‘नियमित पोशाकमा एकरुपता ल्याउन विद्यालयले व्यवस्था गर्न सक्छ । तर, त्यसबाहेक अन्य पोशाकका लागि विद्यार्थीलाई बाध्य पार्न मिल्दैन ।’, उनले भने, ‘कतिपय विद्यालयहरुले अन्य पोशाक खरिद गर्न बाध्य पारेको गुनासो आएको छ । त्यस्ता विद्यालयहरुलाई कारवाही गर्छौँ ।’

महानगरपालिकाले सार्वजनिक सूचना नै जारी गरेर नियमित विद्यालय पोशाकभन्दा फरक पोशाक किन्न बाध्य पारेको पाइए महागनरपालिकाको शिक्षा ऐन, २०७५ बमोजिम कारबाही गर्ने जनाएको छ । साथै, त्यस्तो गरेको थाहा पाए महानगरपालिकालाई जानकारी गराउन समेत महानगरले सुचित गरेको छ ।