">
काठमाडौँ । वाइडबडी प्रकरणको अनुसन्धान गरिरहेको अख्तियार दुरुपयोग अनुसन्धान आयोगले तीन विदेशी कम्पनीका सञ्चालकलाई बयानका लागि बोलाएको छ । अख्तियारले वाइडबडी विमान खरिद बिक्री प्रकरणमा जोडिएका नेपाली मूलका बेलायती नागरिक दीपक शर्मा, जर्मन नागरिक क्रिश्चियन न्ह्युलेन र रोमानियाका नागरिक ओलेग कालिस्त्रुलाई बयानका लागि बोलाएको हो ।
नेपाल वायुसेवा निगमले ए–३३०–२०० विमान खरिद गर्दा आर्थिक अनियमितता भएको भन्ने उजुरीमाथिको छानविनका क्रममा उनीहरुलाई बोलाइएको अख्तियारले जनाएको छ ।
तीनै जनाको नाममा अख्तियारले १५ दिने सूचना जारी गरेको छ । द राइजिङ नेपाल दैनिकमा सूचना जारी गर्दै आयोगले तीनैजनालाई १५ दिनभित्र कार्यालयमा उपस्थित हुन भनेको छ ।
अख्तियारले उपस्थित हुन भनेका बेलायती नागरिक दीपक शर्मा नेपाल वायुसेवा निगमलाई दुईवटा वाइडबडी विमान बेच्ने सम्झौता गरेको अमेरिकाको एएआर कर्पोरेसनका अध्यक्ष हुन् । त्यस्तै, जर्मन नागरिक क्रिश्चियन न्ह्युलेन जर्मनीस्थित एभिएसन क्यापिटल र निगमलाई विमान बेच्न आयरल्याण्डमा दर्ता गरिएको हाई फ्लाइ एक्सका निर्देशक हुन् भने रोमानियाका ओलेग कालिस्त्रु जर्मन एभिएसन क्यापिटलका वित्तीय निर्देशक हुन् ।
‘देहायका व्यक्ति पासपोर्ट र हालसालै खिचिएको फोटोसहित अख्तियार दुरुपयोग अनुसन्धान आयोगको टंगालस्थित कार्यालयको कोठा नम्बर १०८ मा १५ दिनभित्र उपस्थित हुन यो सूचना प्रकाशित गरिएको छ ।’, अख्तियारले सार्वजनिक गरेको सूचनामा भनिएको छ ।
