काठमाडौँ । नेप्सेले कारोबार प्रणाली लगायतका सम्पूर्ण आईटी जोडिएका सिष्टमहरुको परिक्षणका लागि गरेको 'इन्फर्मेसन सिष्टम अडिट (आईएस अडिट)' ले नेप्सेको कारोबार प्रणाली असुरक्षित रहेको खुलासा गरेको छ । नेप्सेले गराएको आईएस अडिटका क्रममा केहि सार्है संवेदनशील विषयको उठान भएको पाइएको छ भने अन्य थुप्रै जोखिमहरु पनि नेप्सेको कारोबार प्रणालीमा रहेको खुलासा भएको छ । आफ्नो कमजोरी बाहिर आउने डरले नेप्सेले प्रतिवेदनले उठाएका विषयहरुको सम्बोधन गर्नुको सट्टा आइएस अडिटको यो प्रतिवेदन लुकाएर राख्ने गरेको छ ।

नेप्सेको कारोबार प्रणाली वाईकोले निर्माण गरेको हो । अर्थ सरोकारले गोप्य स्रोतबाट प्राप्त गरेको नेप्सेको आइएस अडिट प्रतिवेदनमा नेप्सेको कारोबार प्रणालीको पूरै सिष्टम वाईकोकै सुपरभिजनमा रहेको, र त्यसमा वाईकोले कुनै पनि खालको संवेदनशील परिवर्तन गर्न सक्ने र सोको ट्र्याकिङसमेत नेप्सेले गर्न नसक्ने उल्लेख छ । वाईकोलाई प्रणालीको पूरै पहुँच दिंदा त्यसले कुनै पनि दुर्घटना निम्त्याउन सक्ने सो प्रतिवेदनले खुलासा गरेको छ । सो प्रतिवेदनमा नेप्सेको यो सुरक्षा कमजोरीलाई सबैभन्दा 'क्रिटिकल' भनिएको छ । प्रतिवेदनमा सम्पूर्ण सिष्टम भेण्डर अर्थात वाईकोको पहुँचमा रहेकाले यसले कुनै पनि खालको जोखिम निम्त्याउन सक्ने भन्दै अप्रुभल सिष्टम राखिनुपर्ने भनी सिफारिससमेत गरेको छ ।