काठमाडौँ । यतिबेला बैंक मेनेजरहरूमाथि रिकभरीको ‘प्रेसर’ छ । नयाँ कर्जा प्रवाह नभएको स्थितिमा बैंकरहरु पूरापूर रिकभरीमा व्यस्त छन् । मन्दीको प्रभावले रिकभरी निकै चुनौतिपूर्ण बन्दै जाँदा यता सोहि प्रेसरका कारण बैंक मेनेजरहरुको स्वास्थमा समस्या देखिन थालेको छ । यसको उदाहरण शनिबार बाहिर आएका दुई घटनाले चित्रण गरेको छ ।
घटना नम्बर १ : बैंक मेनेजर हलमा लडे
एनआईसी एशिया बैंकले ब्रान्च मेनेजर कन्फेरेन्स भन्दै अर्पण बैङ्क्वेटमा ब्रान्च मेनेजरहरूमाथि बोलाएर कन्फरेन्स गरिरहेको थियो । सो कन्फरेन्सभरी अधिकांश समय कुरा रिकभरीकै थियो । यसै त शनिबार, त्यसमाथि यस्तो उखरमाउलो गर्मी, त्यसमाथि रिकभरीको प्रेसर । सुगरका बिरामी एक मेनेजर ढलिहाले । हलभित्रै बेहोसझैँ लडेपछि उनलाई उनका साथीहरुले पानी छम्किने काम गरेका थिए ।
‘सात दिनमा एक दिन पनि बिदा छैन । यो प्रेसर त छँदै छ, कन्फरेन्सको नाममा थुप्रो दिन ब्रान्च मेनेजरहरुलाई हलभित्र थुनेर, रिकभरीको प्रेसर दिएर, अझ घुमाउरो पाराले थर्काएर, फकाएजस्तो गरेर झन् बढी थर्काएर, प्रेसर दिने काम भएको छ ।’ सो कन्फेरेन्समा भाग लिएका एक ब्रान्च मेनेजरले अर्थ सरोकारसँग भने, ‘हुँदा हुँदा साथीहरू प्रेसर धान्न नसकेर ढल्न थालेका छन् । हप्तामा एक दिन पनि बिदा नदिई निरन्तर काममा बोलाउँदा कर्मचारीहरूको स्वास्थ्यमा समस्या देखिएको छ ।’
घटना नम्बर २ : घरमै ढले ब्रान्च मेनेजर
शुक्रबार राती नै यस्तै अर्को दुखद घटना घट्यो । बिशालनगर तिरका एक ब्रान्चमा कार्यरत एनआईसी एशिया बैंकका कर्मचारीलाई राती रिकभरीका विषयमा एक फोन आयो । फोनमा कुरा सुन्दासुन्दै उनी एकासी ढले । हर्ट अट्याकको शंका पनि भयो । तर, भोलिपल्टको ब्रान्च मेनेजर कन्फेरेन्समा हर्ट अट्याकको हल्ला चल्दा कर्मचारीहरूले आवाज उठाउने देखेर उनले सामान्य घाँटीको दुखाई भयो भनेर कन्फेरेन्समा आएनन् । डाक्टरको परामर्शमा उनी हाल आराम गरिरहेका छन् । उनी निकटका साथीहरू भन्छन्, ‘कति दिन ढाँट्ने ? जागिर जोगाउन कति दिन चुप लाग्ने ? हप्ताको एक दिनसमेत छुट्टी नपाउने जागिरे बाध्यता कति दिनसम्म यसरी लाचार भएर सहने ?’
यसअघि पनि सो बैंकले काठमाडौँको बसेरा बुटिकमा १५ दिनसम्म यस्तै कन्फरेन्स आयोजना गरेको थियो । सो कन्फरेन्समा बैंकका हाकिमले सुरुमा ‘तपाईंहरुलाई कति दिन जेल जानबाट जोगाउने ?’ भनेर घुमाउरो पाराले थर्काएका थिए । पछि केहि मेनेजरहरुले यसमा सबैले गलत गरेकोजस्तो प्रस्तुती भयो भनेर आपत्ति जनाएपछि हाकिमले पुन, ‘जति गलत गरेपनि हामीले जेल नै त पुर्याएका छैनौँ नि’ भनेर सम्झाउने प्रयास गरेका थिए ।
१५ दिनसम्म सो कन्फरेन्स चलाएपछि ब्रान्च मेनेजरले ब्रान्च मेनेजरलाई यसरी आधा महिनासम्म थुनेर रिकभरी नहुने बताएपछि अन्तिम दिन आकस्मिक रुपमा सो कन्फरेन्सको अन्त्य गरिएको थियो । पुन: थप मेनेजरहरुलाई अर्पण बैङ्कोइटमा कन्फेरेन्सका नाममा बोलाइएको छ, जहाँ सुगर र प्रेसरका बिरामीहरू ढलेका हुन् ।’
माथिका उदाहरण त केही उदाहरणमात्र भए, अन्य बैंकका कर्मचारीहरू पनि रिकभरीको चिन्ताले थालिएका छन् । ‘बजारमा मन्दी छ, बैंकमा एयर इण्डको प्रेसर छ । ऋणी ऋण तिर्न सक्ने अवस्थामा छैनन् । बैंकलाई कसैगरी एनपीएल मेनेज गर्नुछ । बैंकिङ गाह्रो भईसकेको छ ।’ अर्का एक बैंकका कर्मचारीले अर्थ सरोकारसँग भने, ‘अव धेरै चिन्ता नलिने भनेर साथीहरू भकाभक बैंकको जागिर छोडेर विदेशिन थालेका छन् । यस्तै प्रेसर हो भने बैंकको जागिर विदेशको भिसा नआउन्जेल अल्झिने बाटोमात्र हुने पक्का छ ।’