काठमाडौं। प्रहरी हुँ भन्दै डाँका चोरी तथा लुटपाटमा संलग्न चार जना पक्राउ परेका छन् । काठमाडौं उपत्यका अपराध अनुसन्धान कार्यलयबाट खटिएको प्रहरी टोलीले मंगलबार उनीहरूलाई पक्राउ गरी सार्वजनिक गरेको हो। 

प्रहरीका अनुसार उनीहरूले असार ४ गते भक्तपुर सूर्यविनायक नगरपालिका ४ दधिकोट बस्ने ३५ वर्षीय डिल्लीबहादुर राउतको घरमा गई सीआईबी प्रहरी हुँ भन्दै घरधनी र सदस्यहरूलाई नियन्त्रणमा लिएर २ करोड नेपाली रुपैयाँ लुटपाट गरी फरार भएका थिए । 

उक्त घटनामा संलग्न रहेका सुजन रसाइलीसहित ४ जनालाई पक्राउ गरी आवश्यक अनुसन्धान तथा कारबाहीको लागि जिल्ला प्रहरी परिसर भक्तपुर पठाइएको प्रहरीले जनाएको छ। 

पक्राउ पर्नेमा ३० वर्षीय सिन्धुपाल्चोक बाह्रबिसे २ का सुजन रसाइली, सिन्धुपाल्चोक भोटेकोशी २ का ३१ वर्षीय भीमबहादुर तामाङ, ३६ वर्षीय ओखलढुंगा मानेभञ्ज्याङ ३ का मुनाराज राई र ३८ वर्षीय सिन्धुपाल्चोक भोटेकोशी २ कै कृष्णबहादुर बोहरा रहेका छन्।