काठमाडौँ । गत आर्थिक वर्ष २०८०/८१ मा रोजगारी खोज्दै नेपालबाट ७ लाख बढी युवा विदेशिएका छन् । वैदेशिक रोजगार विभागको तथ्याङ्क अनुसार गत वर्षमा ७ लाख ४१ हजार युवा विदेशिएका हुन् ।

गत आर्थिक वर्षमा विदेशिएका युवाको उक्त सङ्ख्या नयाँ र पुनः श्रम स्वीकृति लिएर जाने दुवैको सङ्ख्या रहेको विभागले जनाएको छ ।

यसरी रोजगारीका विदेशिनेहरुमध्ये सबैभन्दा धेरै यूएई गएको विभागको तथ्याङ्कले देखाएको छ । विभागको तथ्याङ्क अनुसार गत आर्थिक वर्षमा मात्रै रोजगारीकै शिलशिलामा नेपालबाट १ लाख ९३ हजार ४ सय ३९ जना युवाहरु यूएई गएका छन् ।

यूएईपछि नेपालीहरु रोजगारीका लागि साउदी अरब, कतार, कुवेत, क्रोयसिया, रोमानिया, माल्टा, पोर्चुगल लगायतका देशमा जाने गरेका छन् ।

विभागको तथ्याङ्कअनुसार गत आर्थिक वर्षको साउनमा ५५ हजार ५ सय ७५, भदौमा ५० हजार ८ सय ८४, असोजमा ५६ हजार २ सय ३५, कात्तिकमा ४३ हजार ६ सय २२, मंसिरमा ६८ हजार २ सय १ र पुसमा ६५ हजार ८ सय १३ नेपाली रोजगारीका क्रममा विदेशिएका छन् । त्यस्तै, माघमा ६२ हजार १ सय ४७, फागुनमा ६५ हजार ६ सय ५८, चैतमा ७० हजार ९ सय ३३, वैशाखमा ७० हजार ६ सय ३७, जेठमा ७२ हजार ६ सय र असारमा ५८ हजार ७ सय ३६ जना नेपालीहरु विदेशिएका छन् ।