काठमाडौँ । नेपाल फाइनान्स कम्पनीको खुद नाफा घटेको छ । कम्पनीले सार्वजनिक गरेको गत आर्थिक वर्षको चौथो त्रैमाससम्को अपरिस्कृत वित्तीय विवरणअनुसार कम्पनीको नाफा १०.०१ प्रतिशतले घटेको हो । यस अवधिमा कम्पनीले १ करोड ८१ लाख रुपैयाँ खुद नाफा आर्जन गरेको छ । जबकी सोही अवधिमा कम्पनीको खुद नाफा २ करोड १ लाख रुपैयाँ रहेको थियो ।
गत आर्थिक वर्षको असार मसान्तसम्ममा कम्पनीको खुद ब्याज आम्दानी १९.८६ प्रतिशतले बढेको छ भने खुद फि तथा कमिशन आम्दानी ७७.९२ प्रतिशतले बढेको छ ।
त्यस्तै, कम्पनीको कुल सञ्चालन आम्दानी ३४.९२ प्रतिशतले बढेर १५ करोड २३ लाख ६५ हजार रुपैयाँ पुगेको छ भने सञ्चालन मुनाफा १०.०३ प्रतिशतले बढेर २ करोड २८ लाख ८३ हजार रुपैयाँ पुगेको छ । समीक्षा अवधिमा कम्पनीको वितरणयोग्य मुनाफा भने २० करोड ८२ लाख २९ हजार रुपैयाँ ऋणात्मक रहेको छ ।
कम्पनीले सार्वजनिक गरेको वित्तीय विवरण अनुसार असार मसान्तसम्म कम्पनीको निष्क्रिय कर्जा १२.१६ प्रतिशतबाट घटेर ९.११ प्रतिशतमा झरेको छ ।
समीक्षा अवधिमा कम्पनीको नाफासँगै प्रतिसेयर आम्दानी (ईपीएस) पनि घटेको छ । यसअवधिमा कम्पनीको यस्तो आम्दानी २९ पैसा घटेर २ रुपैयाँ ४८ पैसा कायम भएको छ भने कम्पनीको प्रतिसेयर नेटवर्थ १३७ रुपैयाँ ५१ पैसा रहेको छ । ७२ करोड ९९ लाख रुपैयाँ चुक्ता पूँजी रहेको कम्पनीको जगेडा कोषमा २७ करोड ३८ लाख रुपैयाँ रहेको छ ।
