काठमाडौँ । बिहीबार राती नेपाल टेलिकमको सेवा अवरुद्ध हुने भएको छ । बिलिङ प्रणाली स्तरोन्नति कार्यका लागि ४ घण्टा टेलिकमको सेवा आंशिक रुपमा अवरुद्ध हुने भएको हो ।
एक सूचना जारी गर्दै कम्पनीले १७ गते (बिहीबार) राति ११ बजेदेखि करिब ४ घण्टाका लागि सेवा अवरुद्ध हुने जनाएको छ । त्यसबीचमा टेलिकममा ब्यालेन्स जाँच, रिचार्ज, प्याकेज खरीद तथा गुनासो सुनुवाइ सम्बन्धी सेवाहरु अवरुद्ध हुनेछन् ।
उक्त समयमा फोन, इन्टरनेट, एसएमएस तथा पिएसटिएन/एफटिटिएच भोइस/डेटा/आईपीटिभी सेवा भने सञ्चालन रहने टेलिकमले जनाएको छ ।
सेवा प्रभावित हुने भन्दै आवश्यक पर्ने ब्यालेन्स रिचार्ज तथा प्याकेज खरिद सेवा प्रभावित हुनुभन्दा अघि नै खरिद गर्न पनि टेलिकमले आफ्ना ग्राहकहरुलाई आग्रह गरेको छ ।
