काठमाडौं । वैदेशिक रोजगारीका लागि विभिन्न देश पठाईदिने भन्दै रकम ठगी गर्ने एक जना पक्राउ परेका छन् । पक्राउ पर्नेमा सिराहा जिल्ला करजन्हा नगरपालिका वडा नं. ६ घर भई हाल ललितपुर जिल्ला महालक्ष्मी नगरपालिका वडा नं. ०४ इमाडोल बस्ने ३२ वर्षीय गणेश कुमार ठाकुर रहेका छन् ।
उनले बसुन्धारा स्थित ओम इन्टरनेशनल प्रा.लिबाट बेरोजगार युवा युवतीलाई आकर्षक तलबको प्रलोभनमा पारी वैदेशिक रोजगारीका लागि दुबई, कतार, साउदी, मलेसिया र कुवेत लगायतका देशहरुमा पठाउने भन्दै रकम ठगी गरेका थिए ।
उनले ८५ जना व्यक्तिहरुबाट कुल एक करोड ९७ लाख १७ हजार रुपैयाँ ठगी गरेको प्रहरीले जनाएको छ ।
उनलाई साउन १४ गते काठमाडौँ उपत्यका अपराध अनुसन्धान कार्यलयबाट खटिएको प्रहरी टोलीले इमाडोलबाट पक्राउ गरेको हो । हाल ठाकुरलाई थप अनुसन्धान तथा आवश्यक कारवाहीका लागि वैदेशिक रोजगार विभाग पठाईएको छ ।
