काठमाडौँ । नेपाल रिपब्लिक मिडियाले गत आर्थिक वर्षको चौथो त्रैमाससम्मको अपरिस्कृत वित्तीय विवरण सार्वजनिक गरेको छ । विवरणअनुसार कम्पनीको नाफा २८८.२९ प्रतिशतले बढेको छ । यसअवधिमा कम्पनीले कुल ४० लाख ७७ हजार रुपैयाँ खुद नाफा कमाएको छ । कम्पनीले अघिल्लो आर्थिक वर्षको सोही अवधिमा १० लाख ५० हजार रुपैयाँ मात्र खुद नाफा आर्जन गरेको थियो ।
यसअवधिमा कम्पनीको आम्दानी १६.३० प्रतिशतले घटेको छ भने कुल आम्दानीमा पनि १०.७८ प्रतिशत गिरावट आएको छ ।
असार मसान्तसम्ममा कम्पनीको अन्य आम्दानी २९.०३ प्रतिशतले घटेको छ भने सञ्चालन मुनाफा २१.६० प्रतिशतले घटेको छ । त्यस्तै, समीक्षा अवधिमा कम्पनीको वित्तीय शुल्क ६ करोड २४ लाख रुपैयाँबाट घटेर ३ करोड ७१ लाख रुपैयाँमा झरेको छ । आम्दानी घटे पनि वित्तीय शुल्क घटेका कारण कम्पनीको नाफा उल्लेख्य बढेको हो ।
समीक्षा अवधिमा कम्पनीको नाफासँगै प्रतिसेयर आम्दानी (ईपीएस) पनि बढेको छ । यसअवधिमा कम्पनीको ईपीएस ३१ पैसाले बढेर ४२ पैसा पुगेको छ ।
त्यस्तै, कम्पनीको प्रतिसेयर नेटवर्थ समीक्षा अवधिमा ८८ रुपैयाँ ७७ पैसा छ भने कम्पनीको रिटेन्ड अर्निङ ५० करोड ५७ लाख रुपैयाँ ऋणात्मक रहेको छ ।
