काठमाडौँ । अस्थायी ट्राफिक प्रहरी पोष्ट फुलवारीका प्रमुख तथा प्रहरी हवल्दार शिद्धराज विष्ट सम्मानित भएका छन् ।
ट्राफिक व्यवस्थापनमा अब्बल भूमिका खेलेको भन्दै विष्टलाई धनगढी-१६ बेहडाबाबा मन्दिरमा लागेको श्री शिवपुराण ज्ञान महायज्ञ अभिषेकात्मक अनुष्ठान तथा श्रृंगारिक महाआरती कार्यक्रममा सम्मानित गरिएको हो ।
हरेक वर्ष साउन महिनाभर बेहडाबाबा मन्दिरमा दर्शनार्थिको भीड व्यवस्थापन तथा सहज यात्रामा सास्ती हुँदै आएको भए पनि यसपालि विष्टको कमाण्डमा अहिलेसम्मकै उत्कृष्ट ट्राफिक व्यवस्थापन तथा सहज यात्रा भएको दाबी गरिएको छ । सोही अनुसार विष्टलाई सम्मानसमेत गरिएको हो ।
यसो त अस्थायी ट्राफिक प्रहरी पोष्टको कमाण्ड विष्टले सम्हालेपछि फुलवारी क्षेत्रमा ट्राफिक सचेतना कार्यक्रम चुस्त भएको छ । उनले विद्यालय, समूह तथा गाउँगाउँमा गएर अभिभावक तथा सवारी चालकलाई ट्राफिक नियम सिकाउने र नियम पालना गर्ने सवारी चालकलाई सम्मानसमेत गर्दै आएका छन् । विष्टको कमाण्डपछि फुलवारी क्षेत्रमा सडक दुर्घटना पनि विगतको भन्दा कम भएको स्थानीयहरुले बताएका छन् ।
