काठमाडौँ । अवैध रुपमा कल सेन्टर चलाउने दुई जना चिनियाँ नागरिकसहित ५० जना पक्राउ परेका छन् । 

प्रहरीको केन्द्रीय अनुसन्धान ब्युरो (सीआईबी)ले ललितपुरको जावलाखेलबाट उनीहरुलाई पक्राउ गरेको हो । पक्राउ पर्नेमा दुई जना चिनियाँ नागरिक र एक जना फिलिपिनो नागरिक रहेको सीआईबीले जनाएको छ । 

उनीहरुमाथि अवैध रुपमा कल सेन्टर चलाउनुका साथै अनलाइन जुवा खेलाएको र नेपालमा बर्जित क्रिप्टो कारोबार गरेको आरोप छ ।

अवैध रुपमा कानून विपरीतका गतिविधि भएको भन्ने सूचनाका आधारमा बुधबार राति छापा मारेर उनीहरुलाई पक्राउ गरिएको सीआईबीले जनाएको छ । सीआईबीका अनुसार उनीहरुमाथि थप अनुसन्धान भइरहेको छ ।