काठमाडौँ । काठमाडौँबाट स्रोत नखुलेको ६८ लाख रुपैयाँसहित ४ जना पक्राउ परेका छन ।

पक्राउ पर्नेमा काठमाडौँ महानगरपालिका-३२ दोभानपुल बस्ने ४६ वर्षीय राज कुमार माली, सोही महानगरपालिका-१० नयाँ बानेश्वर बस्ने १८ वर्षीय किशोर, सोही महानगरपालिका-७ शान्तिगोरेटो बस्ने झापा अर्जुनधारा नगरपालिका-७ घर भएका ३२ वर्षीय प्रवेश कुमार पौडेल र झापा बिर्तामोड नगरपालिका-५ घर भएका २७ वर्षीय युवराज सुबेदी रहेका छन् ।

उनीहरुलाई प्रहरी वृत्त गौशालाबाट खटिएको प्रहरी टोलीले काठमाडौँ महानगरपालिका-९ सिनामंगल शम्भुमार्गस्थित सडकबाट पक्राउ गरेको हो ।

पक्राउ परेकाहरुबाट बरामद गरिएको ६८ लाख रुपैयाँ हुण्डीको हुनसक्ने आशंका प्रहरीले गरेको छ । उनीहरुमाथि थप अनुसन्धान भइरहेको प्रहरीले जनाएको छ ।