काठमाडौँ । शुक्रबार बिहान २ बजेर ५१ मिनेटमा काठमाडौँ आसपासका क्षेत्रमा भूकम्पको धक्का महसुस गरिएको छ ।
भूकम्पबारे प्राप्त अपडेट अनुसार भूकम्प सिन्धुपाल्चोकको भैरवकुण्ड केन्द्रबिन्दु भएर गएको थियो । राष्ट्रिय भूकम्प मापन केन्द्रका अनुसार शुक्रबार ६.१ म्याग्निच्युडको भूकम्प मापन गरिएको छ ।
भूकम्पको धक्काले सिन्धुपाल्चोकमा सामान्य क्षति पुगेको छ । जिल्लाका प्रमुख जिल्ला अधिकारी किरण थापाका अनुसार भूकम्पका कारण कोदारीस्थित प्रहरी चौकीको भित्ता चर्किएको छ भने आत्तिएर भाग्ने क्रममा एक जना कैदीको हात भाँचिएको छ ।
त्यस्तै, भूकम्पका कारण भोटेकोशी गाउँपालिका-३ स्थित दुगुनागढीमा पहिरो खसेको छ भने अन्य घर तथा भौतिक संरचनामा सामान्य क्षति पुगेको छ । भूकम्पका कारण रातको समयमा निद्रामा रहेका मानिस समेत खुला स्थानमा आत्तिएर निस्केका थिए । भूकम्पबारे थप विवरण आउन बाँकी छ ।
