काठमाडौँ । काठमाडौँको वायु गुणस्तरमा सुधार देखिएको छ । लामो समयपछि काठमाडौँमा पानी परेपछि वायु गुणस्तरमा सुधार देखिएको हो ।

वायुको गुणस्तरमा सुधार आएसँगै काठमाडौँ विश्वकै वायु प्रदूषित सहरको सूचीमा १२औँ नम्बरमा झरेको छ । जबकी बुधबार दिउँसोसम्म पनि काठमाडौँ विश्वकै प्रदूषित सहरको सूचीमा दोस्रो नम्बरमा थियो ।

पानी परेसँगै वायुमण्डलमा जम्मा भएको धूलो, धुँवा र हावाको कण पखालिँदै गएपछि वायुको गुणस्तर सुध्रिएको हो । काठमाडौँमा बिहीबार, शुक्रबार र शनिबार पनि पानी पर्ने पूर्वानुमान भएकाले वायुको गुणस्तर अझै सुध्रिने अनुमान गरिएको छ ।

आईक्यू एयरका अनुसार बिहीबार बिहान काठमाडौँको वायु गुणस्तर सूचकांक ११९ छ । वायु गुणस्तर ०-५० एक्यूआई हुनु स्वास्थ्यका लागि राम्रो मानिन्छ । त्यस्तै, ५१-१०० एक्यूआई मध्यम, १०१-१५० एक्यूआई हुँदा संवेदनशील समूहका लागि अस्वस्थ, १५१-२०० एक्यूआई अस्वस्थ र २०१-३०० निकै अस्वस्थ मानिन्छ । ३०१ एक्यूआई भन्दा माथि भएमा खतरनाक मानिन्छ ।