काठमाडौँ । पूर्वप्रधानमन्त्री तथा माओवादी केन्द्रका अध्यक्ष पुष्पकमल दाहाल (प्रचण्ड)ले शिक्षक आन्दोलन नरोक्न अपिल गरेका छन् । नेपाल कम्युनिस्ट पार्टीको ७७औँ स्थापना दिवसको अवसरमा पेरिसडाँडामा आयोजित कार्यक्रमलाई सम्बोधन गर्दै प्रचण्डले शिक्षकहरुलाई यस्तो अपिल गरेका हुन् ।
प्रचण्डले यसअघि पनि पटकपटक सरकारबाट शिक्षकहरुले धोका पाएको भन्दै यसपटक माग पूर्ण रुपमा सम्बोधन नहुँदासम्म आन्दोलन नरोक्न अपिल गरेका छन् ।
यसपटक पनि सहमति गरेर घर फर्किए पुनः शिक्षकहरुले धोका पाउन सक्ने प्रचण्डले बताएका छन् । त्यसैले पनि आन्दोलनलाई धैर्यतापूर्वक जारी राख्न प्रचण्डले आन्दोलनरत शिक्षकहरुलाई आग्रह गरेका छन् ।
त्यस्तै, प्रचण्डले शिक्षकहरुको आन्दोलनकै बीचमा शिक्षामन्त्रीले पदबाट राजिनामा दिनु सरकारको गैरजिम्मेवारीको अर्को प्रमाण भएको पनि बताएका छन् । शिक्षा ऐन जारी गर्नुपर्ने माग गर्दै शिक्षकहरु पछिल्लो २१ दिनदेखि काठमाडौँमा आन्दोलनरत छन् । सरकारसँग पटक पटक वार्ता भए पनि सहमति भने हुन सकेको छैन ।
