काठमाडौँ । बीमा दाबी भुक्तानीमा बीमितलाई झुलाएर दुःख दिने गरेको आरोप लागेको सूर्यज्योति लाइफ इन्स्योरेन्सका सिइओ प्रकाश बिक्रम खत्रीले सूर्यज्योति लाइफ इन्स्योरेन्सको पहिलो प्राथमिकता दाबी भुक्तानी रहेको बताएका छन् ।
सूर्यज्योति लाइफ इन्स्योरेन्सको ‘इ कर्जा र सूर्यज्योति केयरर्स डिजिटल कार्ड’को शुभारम्भ कार्यक्रमका बोल्दै सिइओ खत्रीले बीमा दाबी भुक्तानी आफूहरुको पहिलो प्राथमिकता भएको बताएका हुन् ।
त्यस्तै, उनले बीमा दाबी भुक्तानीलाई कम्पनीको सिद्धान्तका रुपमा व्याख्या गरेका छन् । सूर्यज्योति लाइफ इन्स्योरेन्स कम्पनीमा जति दाबी आउँछ, त्यसलाई सकेसम्म छिटो सेटलमेन्ट गर्ने प्रयत्नमा कम्पनी रहेको पनि सिइओ खत्रीले उल्लेख गरेका छन् ।
तर, सिइओले आफूहरुको पहिलो प्राथमिकता बीमा दाबी भुक्तानी भएको बताए पनि हाल बीमा दाबी भुक्तानीमा बीमितलाई सबैभन्दा धेरै दुःख दिने इन्स्योरेन्स कम्पनीको सूची तयार पार्ने हो भने सूर्यज्योति एक नम्बरमा आउँछ । यसअघि सूर्यज्योतिले दाबी भुक्तानीमा दिएको दुःखबारे अर्थ सरोकारले तथ्यसहितको समाचार सम्प्रेषण गरिसकेको छ ।
सार्वजनिक कार्यक्रममा सिइओले कम्पनीको पहिलो प्राथमिकता दाबी भुक्तानी भएको बताए पनि बीमितले भने दाबी भुक्तानीमा सूर्यज्योति जति झुर कम्पनी अरु कुनै नभएको बताएका छन् । अर्थ सरोकारको सम्पर्कमा आएका एक बीमितले भने, ‘भन्नलाई त सिइओ सापले पहिलो प्राथमिकता बीमा दाबी भुक्तानी भन्नुभएछ तर खासमा सूर्यज्योतिबाट दाबी भुक्तानी पाउन कति सास्ती खेप्नुपर्छ भन्ने त भोग्नेलाई मात्र थाहा हुन्छ ।’
