काठमाडौँ । त्रिभुवन अन्तराष्ट्रिय विमानस्थलस्थित अध्यागमन कार्यालयका प्रमुख पक्राउ परेका छन् । मानव तस्करीमा संलग्नता रहेको आरोपमा बुधबार प्रहरीले अध्यागमन प्रमुख तीर्थराज भट्टराईलाई पक्राउ गरेको हो । 

मानव तस्करीमा भट्टराईको संलग्नता देखिने प्रमाण फेला परेपछि उनलाई पक्राउ गरिएको अख्तियार दुरुपयोग अनुसन्धान आयोगका एक अधिकारीले बताएका छन् । 

ती अधिकारीका अनुसार भट्टराईलाई पक्राउ गरेर उनको मोबाइलसमेत जफत गरिएको छ । मोबाइलसँगै आवश्यक कागजातहरु पनि नियन्त्रणमा लिएर भट्टराईमाथि थप अनुसन्धान सुरु गरिएको ती अधिकारीले बताएका छन् । 

यसो त मानव तस्करीमा तस्करसँग भट्टराईको साँठगाँठ रहेको सूचना पुगेपछि अख्तियारले अनुसन्धान थालेको थियो । सो सूचना गृह मन्त्रालयसम्म पुगेको थियो । सो सूचना पाउनसाथ उनी एकदिन अघि मात्र सरुवामा परेका थिए ।