सरकारी कर्मचारीहरुलाई कतिपय कार्यालयमा सेयर बजारमा कारोबार गर्न रोक नै लगाइएको छ भने कतिपय कार्यालयमा ड्युटी समयमा अन्य काम गर्न पूर्ण रुपमा रोक लगाइएको छ । सेयर कारोबार समय कार्यालय समयभन्दा फरक पार्दा आफुहरु पनि सेयर कारोबारमा संलग्न हुन पाउने भन्दै उनीहरुले यस्तो माग राखेका हुन् ।
‘विदेशमा काम गर्ने हामीजस्ता नेपालीहरूलाई समय फरक भएर बिहानको कारोबार समयमा सहभागिता जनाउन गाह्रो हुन्छ। साँझ ५ बजेसम्म बजार खुला भएमा हामीलाई पनि सहज हुने थियो,’ कोरियामा बस्ने एक नेपालीले अर्थ सरोकारसँग भने, ‘यो विषय जोडदार रुपमा राख्नुपर्ने बेला भएको छ ।’त्यस्तै, सरकारी कार्यालयमा काम गर्ने कर्मचारीहरूले भने कार्यालय समयको ब्यस्तताका कारण हालको कारोबार समय उनीहरूका लागि उपयुक्त नभएको बताएका छन्। ‘हामी बिहान १० बजे कार्यालय जान्छौँ र बेलुका ५ बजे मात्र फुर्सद हुन्छ। अहिलेको समयमा बजारमा सहभागी हुन पाउँदैनौँ । सहभागी हुनुपरे पनि हामीले लुकी लुकी गर्नुपरेको अवस्था छ । नेप्से प्रशासनले हाम्रो अनुरोधलाई गम्भीरताका साथ लिनुपर्छ,’ एक सरकारी कर्मचारीले भने।
बजार समय थप्दा बजारको समग्र कारोबार वृद्धिमा सहयोग पुग्ने विश्वास पनि उनीहरूले व्यक्त गरेका छन् । सेयर बजारमा लगानी गर्नेको संख्या बढ्ने र बजार थप बलियो हुने उनीहरूको तर्क छ ।
