काठमाडौँ । सेयर लगानीकर्ताहरुले नेपाल राष्ट्र बैंकका गभर्नर डा. विश्वनाथ पौडेललाई १५ करोडको सीमा हटाउन सुझाव दिएका छन् । सेयर लगानीकर्ता संघ नेपाल, पूँजी बजार लगानीकर्ता संघ र स्वतन्त्र पूँजी बजार लगानीकर्ता संघले राष्ट्र बैंकका गभर्नर पौडेललाई भेटेरै यस्तो सुझाव दिएका हुन् ।

भेटका क्रममा सेयर लगानीकर्ताहरुले सेयर बजारको पछिल्लो अवस्थाका बारेमा गभर्नरलाई ब्रिफिङ गरेका थिए । उनीहरुले आउँदो मौद्रिक नीतिमार्फत व्यक्तिगततर्फको १५ करोडको क्याप हटाउन गभर्नरसँग माग गरेका छन् । 

त्यस्तै, उनीहरुले गभर्नरसँग १५ करोडको क्यापसँगै लघुवित्त वित्तीय संस्थाहरुलाई १५ प्रतिशत भन्दा बढी लाभांश वितरण गर्न नपाउने व्यवस्था खुला अर्थनीति सिद्धान्त विपरीत भएकाले सो व्यवस्था परिवर्तन गर्न माग गरेका छन् । 

अर्कोतर्फ एनआरएनएको हकमा आवश्यक लगानीको वातावरण सृजना गर्नेगरी नीति ल्याउन पनि लगानीकर्ताहरुले गभर्नरलाई सुझाव दिएका छन् । लगानीकर्ताहरुको माग र सुझावलाई गभर्नर पौडेलले सकारात्मक रुपमा लिएको बताइएको छ । ‘हामीले गभर्नरज्युलाई पूँजी बजारको अवस्था र सुधारका विषयमा राम्रैसँग ब्रिफिङ गरेका छौँ ।’, अर्थ सरोकारसँग कुराकानी गर्दै छलफलमा सहभागी एक लगानीकर्ताले भने, ‘उहाँ हाम्रा माग र सुझावप्रति सकारात्मक हुनुहुन्छ । माग पूरा हुन्छन् भन्नेमा ढुक्क छौँ ।’