काठमाडौँ । राष्ट्रिय प्रजातन्त्र पार्टी (राप्रपा)का प्रमुख सचेतक ज्ञानबहादुर शाहीले सुनको दरमा रेट बढाएर मुलुक ग्रे लिस्टबाट बाहिर ननिस्कने बताएका छन् । अर्थ समितिको बैठकमा बोल्दै सांसद शाहीले यस्तो बताएका हुन् ।
उनले सचिवहरुले मुलुकलाई गे्र लिस्टबाट बाहिर निकाल्न सुनको दरमा रेट बढाएको तर्क गरेको भन्दै झुठो कुरा नगर्न पनि सचेत गराएका छन् ।
समितिमा सोमवार आर्थिक विधेयक मार्फत सुन, चाँदी र गरगहनामा लगाइएको करका सम्बन्धमा नेपाल सुनचाँदी व्यवसायी महासंघले दिएको निवेदन र बैङ्क तथा वित्तीय संस्था सम्बन्धी ऐन, २०७३ लाई संशोधन गर्न बनेको विधेयकको सम्बन्धमा आन्तरिक छलफल भएको हो । जसबारे बोल्दै सांसद शाहीले यो विधेयकले ‘सुन गएर भारतबाट किनेर लेउ र नेपालको व्यवसाय बन्द गर’ भन्ने किसिमको देखिएको जिकिर गरेका छन् ।
त्यस्तै, प्रमुख सचेतक शाहीले यो विधेयकले सुन व्यवसायमा रोजगारी गरिरहेका १० लाख परिवारको घर उजाड्ने जिकिर गरेका छन् ।
