काठमाडौँ । त्रिशूली नदीमा आएको बाढीका कारण २ सय मेगावाट विद्युत उत्पादन बन्द भएको छ । नेपाल विद्युत प्राधिकरणका अनुसार गत राती आएको बाढीका कारण आयोजनामा क्षति हुँदा २ सय मेगावाट बिजुली उत्पादन पूर्ण रुपमा बन्द भएको हो ।
प्राधिकरणका अनुसार बाढीले रुसुवागढी जलविद्युत आयोजनामा बाँधको एउटा गेट बगाएको छ । १११ मेगावाट क्षमताको सोही आयोजनाको पुलमा पनि क्षति पुगेको बताइएको छ । आयोजनाको टेलरेसमा गेग्रान थुप्रिएको छ ।
अर्कोतर्फ ६० मेगावाट क्षमताको त्रिशूली ३ ए आयोजनामा समेत बाढीले क्षति पुर्याएको छ । तर, कति क्षति भयो ? भन्ने विवरण आएको छैन । यता त्रिशूली ३ बी सबस्टेसनमा समेत बाढी पसेपछि उत्पादन बन्द भएको छ ।
त्यस्तै, चिलिमेको पावरहाउसमा समेत बाढी पसेपछि उत्पादन बन्द भएको प्राधिकरणले जनाएको छ । यसरी बाढीले विभिन्न आयोजनामा क्षति पुर्याएपछि कुल २ सय मेगावाट विद्युत उत्पादन बन्द भएको छ ।
