काठमाडौँ । अमेरिकाले थप ३५ नेपालीलाई देश निकाला गरेको छ । अवैध रुपमा अमेरिकामा बस्दै आएका, नियम उल्लंघन गरेका र भिसा विपरीत काम गरिरहेका ३५ नेपालीलाई देश निकाला गरेको हो । 

अमेरिकाबाट देश निकाला भएका ३५ जना नेपाली काठमाडौँ आइपुगेका छन् । अमेरिकाबाट देश निकाला हुनेहरुमा अधिकांश तल्लो बाटो हुँदै अमेरिका पुगेकाहरु रहेको मानव बेचबिखन अनुसन्धान ब्युरोले जनाएको छ । 

ब्युरोका अनुसार एक जना विद्यार्थी भिसामा अमेरिका गएका व्यक्ति समेत रहेका छन् । ती व्यक्तिलाई कलेजमा रिन्यु नगरी भिसा विपरीत काम गरेको पाइएपछि देश निकाला गरिएको बताइएको छ । अर्का एक जनालाई भने भिजिट भिसामा गएर काम गरेको पाइएपछि पक्राउ गरेर डिपोर्ट गरिएको छ ।

बाँकी ३३ जना तल्लो बाटो हुँदै अवैध रुपमा अमेरिका पुगेका थिए । यसरी तल्लो बाटो हुँदै अमेरिका पुग्नेहरुले प्रतिव्यक्ति ८० लाख रुपैयाँसम्म तिरेको पाइएको छ ।