काठमाडौँ । नेपाल राष्ट्र बैंकले समस्याग्रस्त कर्णाली डेभलपमेन्ट बैंकका ३५ सेयरधनीको सेयर १ प्रतिशतमा झार्ने भएको छ । राष्ट्र बैंकले कर्णाली डेभलपमेन्ट बैंकका २५ संस्थापक र १० सर्वसाधारण सेयरधनीको सेयर १ प्रतिशतमा झार्ने भएको हो ।

‘समस्याग्रस्त कर्णाली डेभलपमेन्ट बैंकका सेयरधनीहरुको सेयरपूँजी घटाउने सम्बन्धी सूचना’ प्रकाशित गर्दै राष्ट्र बैंकले यस्तो जनाएको हो ।

राष्ट्र बैंकद्वारा जारी सूचनामा हाल बैंकमा २५ जना संस्थापक सेयरधनीको २१ लाख ६०.६४ कित्ता सेयर छ । उक्त सेयरलाई एक प्रतिशतमा झार्दा २५ जना संस्थापक सेयरधनीको सेयर संख्या २१ हजार तीन सय ६०.६१ कित्ता मात्रै कायम हुनेछ ।

त्यस्तै, १० जना सर्वसाधारण सेयरधनीको कुल १२ हजार ६ सय ८४.९८ कित्ता सेयरलाई एक प्रतिशतमा झार्दा उनीहरुको सेयर १२६.८५ कित्ता मात्र कायम हुनेछ । नेप्सेमा बैंकको ५० लाख २८ हजार तीन सय कित्ता सूचीकृत छन् । जसमध्ये संस्थापकतर्फ २५ लाख ६४ हजार ४३३ कित्ता छन् भने सर्वसाधारण तर्फ २४ लाख ६३ हजार ८६७ कित्ता सूचीकृत छन् । बैंकको उक्त सेयरबाट कुल ४२ प्रतिशत सेयर घट्ने देखिएको छ ।