काठमाडौँ । नेपाल स्काउट राष्ट्रिय प्रधान कार्यालयले पूर्व उर्जामन्त्री दीपक खड्काको कम्पनीलाई बहाल बक्यौता रकम तिर्न अल्टिमेटम दिएको छ । एक सूचना जारी गर्दै स्काउटले खड्काको कम्पनी खड्का ल्याण्ड डेभलपमेन्ट प्रालिलाई भाडा तिर्न ७ दिनको अल्टिमेटम दिएको हो ।

स्काउटले जारी गरेको सूचना अनुसार खड्काको कम्पनीले युवा तथा खेलकुद मन्त्रालय अन्तर्गतको स्काउटको स्वामित्वमा रहेको जग्गा र सो जग्गामा निर्माण भएका संरचना भाडामा प्रयोग गर्दै आएको थियो ।

तर, भाडामा प्रयोग गर्दै आएको जग्गा र भवनको भाडा नतिर्दा स्काउटलाई ठूलो क्षति पुगेको स्काउटले जारी गरेको सूचनामा उल्लेख छ । सोही कारण खड्काको कम्पनीलाई बहालको बक्यौता रकम तिर्न ७ दिनको समय दिइएको स्काउटले जनाएको छ । 

स्काउटका अनुसार बक्यौता रकम तिर्न खड्काको कम्पनीलाई दिइएको यो अन्तिम मौका हो । सात दिनभित्र बक्यौता नतिरे सम्झौताको बुँदा नम्बर ४ र मुलुकको देवानी संहिता २०७४ को परिच्छेद १२, दफा ६१९-६२० (४) र ६२१ बमोजिम जग्गामा निर्माण भएका भौतिक संरचना र सामानहरु जफत गर्ने स्काउटले चेतावनी दिइएको छ ।

पूर्व मन्त्रीसमेत रहेका खड्कामाथि स्काउटको जग्गा कब्जा गरेर खड्का ल्याण्ड प्रालि स्थापना गरेको आरोप लाग्दै आएको छ ।