काठमाडौँ । नेपाल राष्ट्र बैंकले मौद्रिक नीतिको समीक्षा ल्याउने अन्तिम तयारी गरेको छ । राष्ट्र बैंकले चालु आर्थिक वर्षको पहिलो त्रैमासको मौद्रिक नीतिको समीक्षा आइतबार (आज) सार्वजनिक गर्नेगरी तयारी गरेको हो । 

यसो त राष्ट्र बैंकले मौद्रिक नीतिको समीक्षा शुक्रबार सार्वजनिक गर्दै आएको थियो । तर, प्राविधिक समस्याले शुक्रबार समीक्षा सार्वजनिक गर्न नसकिएको राष्ट्र बैंकले जनाएको छ । 

शुक्रबार सार्वजनिक गर्न नसकिएको मौद्रिक नीतिको समीक्षा आइतबार सार्वजनिक गर्नेगरी तयारी गरिएको राष्ट्र बैंकका एक अधिकारीले बताएका छन् । ती अधिकारीका अनुसार अन्यथा नभए आइतबार नै समीक्षा सार्वजनिक हुनेछ । केही समस्या आए मौद्रिक नीतिको समीक्षा सोमबार सार्वजनिक हुनेछ ।

मौद्रिक नीतिको पहिलो त्रैमासिक समीक्षाले बैंकिङ च्यानलमा थुप्रिएर रहेको लगानी विस्तार गर्ने नीति लिने बैंकरहरुले अपेक्षा गरेका छन् । त्यस्तै, सेयर बजारका लगानीकर्ताहरुले पनि बजारमैत्री नीति आउने अपेक्षा गरेका छन् ।