">
वीरगञ्ज । वीरगञ्जका उद्योगी व्यवसायीले दीर्घकालीन औद्योगिक नीति ल्याउन सरकारसँग माग गरेको छ । उद्योग दिवसको अवसरमा वीरगञ्जमा बिहीबार आयोजित कार्यक्रममा उनीहरुले राजनीतिक नेतृत्व परिवर्तन हुँदा पनि परिवर्तन नहुने गरी २० वर्षे वा ४० वर्षे औद्योगिक नीति ल्याउन सरकारसँग माग गरेको हो ।
अस्थिर राजनीति र राजनैतिक नेतृत्वको स्वार्थले औद्योगिक नीतिमा परिवर्तन हुँदा उद्योगी व्यवसायी मर्कामा पर्ने गरेको उनीहरुको भनाई छ । वीरगञ्ज उद्योग वाणिज्य संघका उपाध्यक्ष हरि गौतमले राजनैतिक अस्थिरताको मारबाट मुक्ति पाउन २० वर्षे औद्योगिक नीति आवश्यक रहेको बताएका छन् ।
यस्तै नेपाली युवा उद्यमी मञ्च वीरगञ्जका अध्यक्ष अनुप अग्रवालले विदेशी लगानी भित्र्याउँदा स्वदेशी उद्योगलाई मर्कामा पार्न नहुने बताए । नेपाल उद्योग वाणिज्य महासंघ प्रदेश नं २ का अध्यक्ष गणेश लाठले भारतीय पर्यटकले २५ हजार भारतीय रुपैयाँ बोकेर आउँदा पनि समात्ने हुँदा ‘हुण्डी’ फस्टाएको बताएका छन् । यसैगरी युवा व्यवसायी आशिष लाठले सरकारले उद्योगधन्दालाई आर्थिक मेरुदण्डको रुपमा लिनुपर्ने बताए ।
