काठमाडौं । त्रिभुवन अन्तराष्ट्रिय विमानस्थल भन्सार कार्यालयले २१ किलो सुन बरामद गरेको छ । सोमबार विमानस्थल भन्सार कार्यालयले वैदेशिक रोजगारी र घुम्न गई फर्किएका नेपालीलाई भरिया बनाई बाला र बेरुवा बनाएर नेपाल भित्र्याइएको २१ किलो गहना आकारका सुन बरामद गरेको हो । दुबई कतार र मलेसियाबाट नेपाल फर्किएका ४१५ जना यात्रुले बालाको आकारमा ल्याएको सुन नियन्त्रणमा लिइएको भन्सार कार्यालयले जनाएको छ ।

एक दिनमै यसरी भित्रिएको बाला आकारको ठूलो परिमाणको सुनलाई भन्सार तिर्न अनिवार्य गरिएको छ । मंगलबार बिहानसम्म सुन बोकेर आएका १९५ जना यात्रुले बरामद भएकोमध्ये ९ किलो ९७६ ग्राम सुन भन्सार तिरेर लगेका छन् । यस्तो सुनमा भन्सार रकम हालसम्म ९४ लाख ६५ हजार ५४८ रुपैयाँ भन्सार संकलन भएको भन्सार कार्यालयले जनाएको छ ।