काठमाडौं । देशभर विभिन्न घटना घट्छन् । केहि सामान्य समाचारका विषय हुन्छन्, केहि समाचारले असामान्य कम्पन पैदा गरिदिन्छन् । केहि तस्विर फगत तस्विरमात्र हुन्छन् भने केहि तस्विरले देश बोल्दछन् । हामी हरेक दिन सातै प्रदेशका त्यस्ता तस्विरहरुलाई प्रकाशन गर्छौँ, जसले देश र जनताको आर्थिक स्थिति प्रतिनिधित्व गर्छ । समसामयिक विषयमा राज्यलाई खबरदारी गर्छ र जनताको जीवन बोल्छ ।
आज कुन-कुन ठाउँमा के-के भयो ? यी दृश्यहरु आफैं बोलिरहेछन् । आजको अंकमा हामीले उखु काट्दै कञ्चनपुरका किसानदेखि सडकमा नाली निर्माण गर्दै म्याग्दीका मजदुरसम्मका तस्विरलाई फोटोमा समेटेका छौं ।
हेरौं फोटो समाचार :
शुक्लाफाँटा नगरपालिका –२, रानीपुरका किसान उखु काट्दै । चिनी मिल सञ्चालनमा आएपछि कञ्चनपुरमा व्यावसायिक उखुखेती गर्ने किसानको सङ्ख्या बढ्न थालेको छ ।
म्याग्दीको रघुगङ्गा गाउँपालिका–३ मौवाफाँटस्थित सडकमा नाली निर्माण गर्दै मजदुर । नेपाल बिद्युत् प्राधिकरणको सहायक कम्पनी रघुगङ्गा हाइड्रोपावर प्रवद्र्धक रहेर निर्माणाधीन ४० मेगावाट क्षमताको राहुघाट जलविद्युत् आयोजनाले बिद्युतगृहदेखि बाँध जोड्ने सडक स्तरोन्नति गरिरहेको छ ।
वन्यजन्तुबाट बाली जोगाउन कावासोतीको साँढमा राखिएको मानव आकृतिजस्तो देखिने बुख्याचा । रातिको समयमा बन्यजन्तुले बाली नखाउन भनेर यस क्षेत्रका स्थानीयले खेतबारीमा बुख्याचा राख्ने गरेका छन् ।
ल्होसार पर्वको अन्तिम दिन बुधबार आफ्नै पुरानो साँकृति पहिरमा सजिएका लामा समुदायका महिला ।
मौसमका कारण बिहीबार समयमै आन्तरिक विमान नउडेपछि यात्रु विमानस्थलको प्रतीक्षालयमा उडानका लागि विमान कुर्दै ।
पुसको कठ्ङग्रिदो जाडोमा घोराही बजारको मुख्य सडक छेउमा ठेलामा बदाम भुट्दै व्यापारी । भुटेको बदाम दैनिक रु दुई÷ तीन हजारको बिक्री हुने उहाँ बताउनुहुन्छ । दाङमा बदाम प्रति किलो रु २८० मा बिक्री हुने गरेको छ।
