काठमाडौं । पञ्चकन्या माई हाईड्रोपावरले तीन आर्थिक वर्षको संयुक्त साधारणसभा पुस २८ गते भर्चुअल माध्यमबाट गर्ने भएको छ । कम्पनीले मंगलबार सूचना जारी गर्दै कोभिडको संक्रमण बढिरहेको भन्दै भौतिक उपस्थिति जोखिम भएकाले भर्चुअल माध्यबाट सभा गर्ने जानकारी दिएको हो ।
सम्बन्धित सेयरधनीहरुलाई सोही बमोजिम उपस्थितिको लागि व्यवस्था मिलाईने जानकारीसमेत कम्पनीले दिएको छ । कम्पनीको पुस ५ गतेको सञ्चालक समितिको बैठकले कुपण्डोल ब्यांक्वेट, कुपण्डोल, ललितपुरमा बिहान ११ बजे सभा गर्ने निर्णय गरेको थियो । सभाले आर्थिक वर्ष ०७५/७६, ०७६/७७ र ०७७/७८ सम्मको वार्षिक प्रतिवेदन सहितका वित्तीय विवरणहरुलाई पारित गर्नेछ ।
यस्तै चालू आर्थिक वर्षको लागि लेखापरीक्षक नियुक्ती र निजको पारिश्रमिक निर्धारणको विषयलाई पनि सभाले टुङ्ग्याउनेछ । संस्थापक समूहबाट चार जना सञ्चालक निर्वाचन वा मनोनयन गर्ने विषय पनि सभाका लागि तय भएको छ । सभा प्रयोजनका लागि कम्पनीले पुस २० गते बुक क्लोज गरिसकेको छ ।
