काठमाडौं । नेपाल राष्ट्र बैंकका डेपुटी गभर्नर बमबहादुर मिश्रले दृष्टिविहीन तथा अपाङ्गता भएका व्यक्तिलाई सेवा नदिने बैंक तथा वित्तीय संस्थालाई कारवाही हुने बताएका छन् । आज शुक्रबार नेपाल आर्थिक पत्रकार संघ (नाफिज) ले आयोजना गरेको ‘दृष्टिविहीनमा वित्तीय पहुँचः समस्या र समाधान’ विषयमा अन्तरक्रिया कार्यक्रममा बोल्दै उनले बैंक तथा वित्तीय संस्थालाई दृष्टिविहीन तथा अपाङ्गता भएका व्यक्तिलाई पनि सहज सेवा दिन निर्देशन दिएका हुन् ।

पछिल्लो समय बैंक तथा वित्तीय संस्थाले दृष्टिविहीनहरुलाई बैंकिङ सेवा दिनमा आनाकानी गर्ने गरेको गुनासो बढ्दै गएको थियो । र सो गुनासो राष्ट्र बैंकसम्म पनि पुगेको थियो । सोहि विषयलाई ध्यानमा राख्दै डेपुटी गभर्नर मिश्रले दृष्टिविहीन, अपंगता भएकै कारण उनीहरुलाई बैंक तथा वित्तीय संस्था सेवा दिन अस्वीकार गरेमा राष्ट्र बैंकले कारवाही गर्ने बताएका हुन् ।

यस्तै उनले आगामी मौद्रिक नीतिमा दृष्टिविहीन, अपंगता तथा फरक क्षमता भएको व्यक्तिको बैंकिङ पहँच बारेमा समेटिनेसमेत कार्यक्रममार्फत बताए । सो कार्यक्रममा नेपाल स्टक एक्सचेन्ज (नेप्से), स्टक ब्रोकर एशोसियन, मर्चेट ब्रोकर एशोसियसन, डेभलपमेन्ट बैंकर्स एशोसियनका प्रतिनिधिहरुलेसमेत आफ्नो मन्तव्य राखेको थिए ।