काठमाडौं । नारायणी डेभलपमेन्ट बैंकको १ लाख ४५ हजार कित्ता सेयर लिलामीमा आउने भएको छ । बैंकले बिक्री खुला गरेको १०० प्रतिशत हकप्रद सेयर गत फागुन २६ गते बिहीबार बाँडफाँट गरेको थियो । बैंकले १३ लाख १२ हजार ३३८ कित्ता हकप्रद सेयर बिक्री खुला गरेकोमा २४ सय ३० जना सेयरधनीबाट ११ लाख ६६ हजार ६८९ कित्ताका लागि मात्र आवेदन परेको थियो । जसमध्ये १ लाख ४५ हजार ६४९ कित्ता हकप्रद बिक्री हुन सकेको थिएन । सोही बिक्री नभएको बाँकी सेयर बैंकले अब लिलामीमा ल्याउने भएको हो ।
बैंकले पुस ७ गतेदेखि माघ १२ गतेसम्म १३ लाख १२ हजार ३३८ कित्ता हकप्रद सेयर बिक्री खुला गरेको थियो । बैंकको हाल चुक्ता पुँजी १३ करोड १२ लाख ३३ हजार ८०० रुपैयाँ रहेको छ । हकप्रद र लिलामी सेयर बिक्रीपछि बैंकको चुक्ता पुँजी २६ करोड २४ लाख ६७ हजार ६०० रुपैयाँ पुग्ने कम्पनीले जनाएको छ ।
