काठमाडौं । भन्सार विभागले चालू आर्थिक वर्षको आठ महिनामा नेपालको व्यापार घाटा ११ खर्ब नाघेको जनाएको छ । विभागले सार्वजनिक गरेको तथ्यांक अनुसार चालू आर्थिक वर्षको फागुन महिनासम्म नेपालको व्यापार घाटा ११ खर्ब ६० अर्ब ९८ करोड ८७ लाख रुपैयाँ पुगेको हो ।
गत आवको सोही अवधिमा नेपालले ८ खर्ब ६३ अर्ब २० करोड ९३ लाख बराबरको व्यापार घाटा व्यहोरेको थियो ।यस अवधिमा १३ खर्ब ८ अर्ब ७३ करोड ४८ लाख रुपैयाँ बराबरको वस्तु आयात भएको विभागले जनाएको छ । गत आबको सोही अवधिमा ९ खर्ब ४३ अर्ब ९८ करोड ८२ लाख बढीको आयात भएको थियो ।
यस अवधिमा एक खर्ब ४७ अर्ब ७४ करोड ६० लाख ६६ हजार रुपैयाँ बराबरको वस्तु निर्यात भएको तथ्यांकमा उल्लेख छ । गत आवको सोही अवधिमा नेपालबाट ८० अर्ब ७७ करोड ८८ लाख बराबरको सामान निर्यात भएको थियो । चालू आर्थिक वर्षको माघ मसान्तसम्म नेपालको वैदेशिक व्यापार ४२.१३ प्रतिशतले बढेको छ ।
यस अवधिमा १४ खर्ब ५६ अर्ब ४८ करोड ९ लाख बराबरको पुगेको विभागले जनाएको छ । विभागको तथ्यांक अनुसार यस अवधिमा नेपालमा १५९ देशबाट आयात भएको छ ।
