काठमाडौं । यातायात व्यवस्था विभागले आजबाट सवारी चालक अनुमति पत्र (लाइसेन्स)का लागि अनलाइन आवेदन आजबाट पुनः खुल्ला गरेको छ । विभागले एक सुचना जारी गर्दै लाइसेन्सका लागि हालसम्म परेका अनलाइन आवेदनहरू रद्द गरी सोमबारबाट अनलाइन आवेदन प्रणाली सुरु गरेको हो ।
विभागका अनुसार नयाँ सवारी चालक अनुमति पत्र प्राप्तका लागि विभागले तोकेको वेवसाइटमा लगईन गरी नयाँ आवेदन फाराम भर्न सक्ने भएका छन् । विभागले अहिले नयाँ प्रविधिको विकास गरेको छ । जसबाट सहजै सेवाग्राहीले सेवा प्रदान गर्ने सक्नेछन् । अबदेखि सेवाग्राहीले नै अनलाइनबाट फाराम भरी आवश्यक दस्तुर र ट्रायलको लागि मिति लिन सक्ने भएका छन् ।
विगतको दिनमा लाइसेन्सका लागि सेवाग्राहीले विभागले तोकेको मितिमा कार्यालयमा सहभागी हुनुपर्ने व्यवस्था थियो । जसमा विभागका उच्च सेवाग्राहीको चापले वर्षौ कुनुपर्ने बाध्यतालाई हटाउँदै विभागले नयाँ प्रविधिको विकास गरेको हो । उक्त प्रविधिले सेवाग्राहीले सहजै लाइसेन्सको प्रक्रिया अगाडि बढाउन सक्ने र सहजै ट्रायल दिन पाउने विभागले जनाएको छ । साथै यातायात व्यवस्था कार्यालयमा तिर्नुपर्ने राजस्व पनि अनलाइनबाटै तिर्न सक्नेछन् ।
