काठमाडौं । आइसिएफसि फाइनान्स लिमिटेडको खुद नाफामा २०.२१ प्रतिशतले गिरावट आएको छ । फाइनान्सले गत आर्थिक वर्षको चौथो त्रैमाससम्मको अपरिष्कृत वित्तीय विवरण प्रकाशित गर्दै गतवर्षमा २० करोड ६ लाख रुपैयाँ खुद नाफा कमाएको जनाएको छ । फाइनान्सले अघिल्लो वर्षको सोही अवधिसम्ममा २५ करोड १४ लाख रुपैयाँ खुद नाफा आर्जन गरेको थियो ।
खुद ब्याज आम्दानी बढेपनि अन्य सञ्चालन आम्दानी घटेपछि फाइनान्सको नाफामा गिरावट आएको प्रक्षेपण गर्दै फाइनान्सले गतवर्षमा ४९.१४ प्रतिशतले खुद ब्याज आम्दानीमा वृद्धि गरेको छ । त्यस्तै फाइनान्सको खुद फि आम्दानी १३.९८ प्रतिशत बढेको छ । कुल सञ्चालन आम्दानी ९.८८ प्रतिशतले घट्दा सञ्चालन मुनाफामा पनि २०.३७ प्रतिशतले घटेको छ । फाइनान्सको वितरणयोग्य मुनाफा भने ११ करोड ८४ लाख रहेको छ ।
नाफामा गिरावट आएसँगै फाइनान्सको प्रतिसेयर आम्दानीमा पनि गिरावट आएको छ । गत आर्थिक वर्षको अन्त्यसम्ममा फाइनान्सको ईपिएस ६ रुपैयाँ ७५ पैसा घटेर १७ रुपैयाँ ८० पैसा पुगेको छ । सो अवधिसम्ममा फाइनान्सको मूल्य आम्दानी अनुपात २५.२८ गुणा रहेको छ भने प्रतिशेयर नेटवर्थ १५४ रुपैयाँ ६४ पैसा रहेको छ । समीक्षा अवधिमा फाइनान्सको चुक्ता पूँजी १०.०४ प्रतिशत बढेको छ भने जगेडा कोष १.६६ प्रतिशत बढेको छ । फाइनान्सको निक्षेप २३.५५ प्रतिशत र कर्जामा ३७.९३ प्रतिशतले वृद्धि भएको छ ।
