काठमाडौं । आर्थिक संकट चुलिदै गएपछि भुटानमा सवारी साधनहरुको आयातमा प्रतिबन्ध लगाइएको छ । विदेशी मुद्रा सञ्चितिमा दबाब परेको ठहर गर्दै भुटान सरकारले व्यावसायीक प्रयोजनका सवारी साधन, अर्थ मुभर्स र कृषि मेसीनरीबाहेक अन्य सवारी साधनको आयातमा पूर्ण रुपमा प्रतिबन्ध लगाइएको अन्तराष्ट्रिय सञ्चार माध्यमले जनाएको छ ।

तेल र खाद्यान्नको चर्को मूल्यवृद्धिले भुटानको अर्थतन्त्रमा नकरात्मक असर परेको हो । भुटानमा ‘शून्य कोभिड नीति’ का कारण विदेशी पर्यटकको आगमन २ वर्षयता ठप्प हुँदा विदेशी मुद्रा सञ्चिति घट्दो क्रममा रहेको छ । सन् २०२१ अप्रिलमा १ अर्ब ४६ करोड अमेरिकी डलर रहेको भुटानको विदेशी मुद्रा सञ्चिति घटेर सोही वर्षको डिसेम्बर महिनामा ९७ करोड डलरमा सिमित भएको थियो । भुटानको अर्थमन्त्रालयले विज्ञप्ति जारी गर्दै २० हजार डलर भन्दा कम मूल्यका व्यवसायीक प्रयोजनका सवारी साधन आयात गर्न र पर्यटन प्रयोग प्रवर्धनका लागि प्रयोग गर्न छुट दिइने जनाएको छ ।

भुटान सरकारले लागु गरेको आयात प्रतिबन्धको व्यवस्था विदेशी मुद्रा सञ्चितिको अवस्था हेरी अबको ६ महिनापछि पुनरावलोकन गरिने भुटान सरकारले जनाएको छ ।