काठमाडौं । नागरिक लगानी कोषले चालु आर्थिक वर्षको पहिलो त्रैमासको वित्तिय विवरण सार्वजनिक गरेको छ । कोषले पहिलो त्रैमासमा २३ करोड २७ लाख २७ हजार रुपैयाँ खुद नाफा आर्जन गरेको छ । जुन खुद नाफा अघिल्लो वर्षको तुलनामा १७.९९ प्रतिशतले धेरै हो ।
कम्पनीले गत वर्षको यसै अवधिमा १९ करोड ७२ लाख ४२ हजार रुपैयाँ आर्जन गरेको थियो । सीआइटीको ब्याज आम्दानीका साथै सेवा शुल्क तथा कमिसन आम्दानी र विविध आम्दानीमा सुधार भएपछि खुद नाफामा वृद्धि भएको देखिएको छ ।
ब्याज आम्दानी ५ करोड ८३ लाख रुपैयाँबाट बढेर १० करोड १२ लाख रुपैयाँ पुगेको छ भने सेवा शुल्क तथा कमिसन आम्दानी २८ करोड १२ लाख रुपैयाँबाट बढेर २९ करोड ३९ लाख रुपैयाँ पुगेको छ । हाल नागरिक लगानी कोषको सेयर पुँजीमा ४ अर्ब २५ करोड १० लाख रुपैयाँ रहेको छ ।
यस्तै, कोषको सेयर प्रिमियम भने गत वर्षको भन्दा घटेर २८ करोड ३८ लाख ७८ हजार रुपैयाँमा सिमित भएको छ । गत वर्ष सेयर प्रिमियम १ अर्ब २६ करोड ४८ लाख रुपैयाँ रहेको थियो । कम्पनीको जगेडा कोष पनि १९ अर्ब ४ करोड रुपैयाँबाट बढेर ३१ अर्ब ४ करोड रुपैयाँ पुगेको छ । मुद्दति निक्षेपमा १ खर्ब २ अर्ब २९ करोड रुपैयाँ लगानी गरेको छ ।
संगठित संस्थाको सेयर तथा धितोपत्रमा लगानी बढाएर २८ अर्ब ७ करोड रुपैयाँ पुर्याएको छ । गत वर्ष भने सेयरमा १६ अर्ब ४५ करोड रुपैयाँ मात्र लगानी गरेको थियो ।लगानीमा प्रतिफल (आरओआई) पनि ७.७१ प्रतिशतबाट बढेर ९.३८ प्रतिशत पुगेको छ । कोषको पुँजी वृद्धिका कारण प्रतिसेयर आम्दानी भने केही घटेको छ ।
असोज मसान्तसम्म आइपुग्दा सीआइटीको प्रतिसेयर आम्दानी २ रुपैयाँ २३ पैसाले घटेर २१ रुपैयाँ ९० पैसा कायम भएको छ । यता, प्रतिसेयर नेटवर्थ भने १५२ रुपैयाँ १४ पैसाबाट बढेर १८९ रुपैयाँ ५ पैसा कायम भएको छ ।
