काठमाडौं । हिमालयन डिष्टिलरी लिमिटेडको नाफामा गिरावट देखिएको छ । कम्पनीले सार्वजनिक गरेको चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण अनुसार पुस मसान्तसम्ममा कम्पनीको खुद नाफा ३६.४१ प्रतिशतले घटेको छ ।
गत आर्थिक वर्षको सोही अवधिमा ४६ करोड २७ लाख रुपैयाँ खुद नाफा आर्जन गरेको कम्पनीले चालु आर्थिक वर्षमा भने २९ करोड ४२ लाख रुपैयाँ खुद नाफा कमाएको हो । देशभर देखिएको आर्थिक मन्दीका कारण मदिरा व्यवसाय प्रभावित हुनुका साथै प्रतिस्पर्धात्मक बजारका कारण र प्रशासनिकसँगै वित्तीय खर्चमा वृद्धि हुँदा नाफामा दबाब परेको कम्पनीले जनाएको छ ।
कम्पनीले सार्वजनिक गरेको वित्तीय विवरण अनुसार समिक्षा अवधिमा कम्पनीको कुल नाफा २२.३६ प्रतिशतले घटेको छ भने बिक्री वितरण आम्दानीमा १८ प्रतिशतको गिरावट आएको छ ।
समिक्षा अवधिमा कम्पनीको नाफासँगै प्रतिसेयर आम्दानी (ईपीएस) पनि ६० रुपैयाँ ९५ पैसाबाट घटेर २४ रुपैयाँ २२ पैसामा सिमित भएको छ । यो अधिमा कम्पनीको प्रतिसेयर नेटवर्थ १२२ रुपैयाँ ९४ पैसा रहेको छ भने मूल्य आम्दानी अनुपात ११२.४१ गुणा रहेको छ ।
२ अर्ब ४२ करोड ९५ लाख रुपैयाँ चुक्ता पूँजी रहेको यस कम्पनीको जगेडा कोषमा ५५ करोड ७४ लाख रुपैयाँ सञ्चित छ।
