काठमाडौं । नेपाल इन्स्योरेन्स कम्पनीका दुई संचालक बर्खास्तमा परेका छन् । नेपाल बीमा प्राधिकरणले कम्पनीका अध्यक्ष अर्जुन शर्मा पौडेल र संचालक विष्णु कुमार खेतान अग्रवाललाई बर्खास्त गरेको हो । संस्थागत सुशासन विपरित नियुक्त भएको भन्दै उनीहरु बर्खास्तीमा परेका हुन् ।

अध्यक्ष पौडेल र संचालक अग्रवाल तेस्रो कार्यकालका लागि कम्पनीको संचालकमा चुनिएका थिए । संस्थागत सुशासन विपरित संचालक रहँदा रहँदै पनि प्राधिकरणले कम्पनी मर्जरमा जाने सहमति अनुसार उनीहरुको नियुक्ति स्वीकृत गरेको थियो । तर, सोमबार प्राधिकरणले पत्राचार गरी अध्यक्ष पौडेल र संचालक अग्रवाललाई बर्खास्त गरेको हो ।

अध्यक्ष पौडेल र संचालक अग्रवालको बर्खास्तसंगै बीमा प्राधिकरणले नेपाल इन्स्योरेन्सका अर्का संचालक चन्द्रसिंह साउदलाई पनि निगरानीमा राखेको छ ।

यसअघि नेपाल इन्स्योरेन्स, प्रुडेन्सियल र आइएमई जनरल इन्स्योरेन्स कम्पनी मर्जर तयारीमा समेत रहेको थियो । तर, नेपाल इन्स्योरेन्सका तीन संचालकका कारण सो मर्जर भाँडिएको कम्पनीको आरोप समेत छ । मर्जरको बाधक बनेपछि प्राधिकरणले बर्खास्त गरेको बताइएको छ ।