काठमाडौं । व्यवसायी दुर्गा प्रसाईंले चैत्र २४ गतेदेखि अनिश्चितकालका लागि नेपाल बन्दको घोषणा गरेका छन् । काठमाडौंमा पत्रकार सम्मेलन आयोजना गर्दै प्रसाईंले नेपाल बन्दको घोषणा गरेका हुन् ।

बन्दको घोषणा गर्दै प्रसाईंले आफूहरुको आन्दोलन हिंसात्मक नहुने दाबी गरेका छन् । ‘बैंक तथा वित्तीय संस्थाको ज्यादतीकाविरुद्धको हाम्रो अभियान र आन्दोलन हिंसात्मक हुँदैन ।’, प्रसाईंले भने, ‘चैत्र २४ गतेदेखि अनिश्चितकालका लागि नेपाल बन्द गर्छौं तर कुनै तोडफोड गर्दैनौँ । हाम्रो आन्दोलन शान्तिपूर्ण हुन्छ ।’ पत्रकार सम्मेलनबाटै प्रसाईंले बैंकहरुले लिलामीका लागि ३५ दिने सूचना निकाल्ने काम तत्काल रोक्नसमेत माग गरेका छन् ।

त्यस्तै, आफूहरुको अभियानलाई सफल पार्न युट्युबरको भूमिका प्रशंसनीय भएको बताउँदै युट्युबरहरुलाई धन्यावाद समेत ज्ञापन गरेका छन् । ‘युट्युबर–युट्युबर भन्थै तिनै युट्युबरकै कारण अहिले बैंक तथा वित्तीय संस्थाबाट पीडित भएकाहरुको आवाज बाहिर आएको छ ।’ उनले भने– ‘उहाँहरुप्रति नमन छ । यो हाम्रो अभियानमा युट्युबरहरुको योगदान र भूमिका सम्मानयोग्य छ । तपाईहरुलाई ति गरिब, निमुखा र पीडितहरुको आशिर्वाद लाग्छ ।’

सम्मेलनकै क्रममा प्रसाईंले आफूसँगै अन्य ठूला घरानाका ब्यापारीका बारेमा पनि बुझ्न आग्रह गरेका छन् । ‘ठूला घरानाका व्यापारीको सम्पत्ति खोजिएन बरु मेरो धितो र ऋणको बारेमा खोजी गरियो । मेरो परिवार त हजार वर्षदेखि यहीँ बस्दै आएको परिवार हो तर हिजो आउने व्यापारीले १० हजार करोडको ऋण कसरी पायो ? त्यो चाहीँ अर्थ सरोकारसँग बुझिदिनुहोला ।’ उनले भने, ‘उहाँहरुले मेरो बारेमा त सबै बुझ्नुभएछ तर ठूला घरानाका व्यापारीका बारेमा पनि खोजिदिनुहोला ।’ बाँकी अंश भिडियोमा हेर्नुहोस्ः