काठमाडौं । प्रधानमन्त्री पुष्पकमल दाहाल (प्रचण्ड)विरुद्ध नाराबाजी गर्ने तीन जना कारागार चलान भएका छन् । अभद्र व्यवहारको कसुरमा जिल्ला प्रशासन कार्यालयले पाँच हजार रुपैयाँ धरौटी तिरेर रिहा हुन आदेश दिए पनि धरौटी नतिरेपछि उनीहरुलाई जेल चलान गरिएको हो ।

गत मंगलबार उनीहरुले प्रधानमन्त्री प्रचण्ड सहभागी एक कार्यक्रममा ‘मूल्यवृद्धि खारेज गर’, ‘बैंकको ब्याज मिनाह गर’ भन्दै प्रधानमन्त्रीविरुद्ध नाराबाजी गरेका थिए । नाराबाजीकै क्रममा प्रहरीले उनीहरुको मुख थुनेर पक्राउ गरी अभद्र व्यवहारको मुद्धा चलाइएको थियो ।

पक्राउ पर्नेमा सोलुखुम्बुका २३ वर्षीय उद्धव बस्नेत, बझाङका १८ वर्षीय विप्लव खड्का र बाग्लुङका सोम शर्मा रहेका छन् । प्रहरीसँगको बयानमा उनीहरुले आफूहरु नेपाल स्वतन्त्र युवा अभियान समूहका अभियान्ता भएको बताएका छन् ।