काठमाडौं । नेपाली कांग्रेसले अर्थमन्त्रीमा डा. प्रकाशशरण महतलाई पठाउने निर्णय गरेको छ । सरकार गठनको तिव्र तयारीमा रहेको सत्ता गठबन्धनमा अर्थ मन्त्रालय नेपाली कांग्रेसले पाउने भएसँगै अथमन्त्री महत हुने निश्चितप्राय भएको हो ।
गृह मन्त्रालय माओवादी केन्द्रले लिने भएसँगै अर्थमन्त्रालय नेपाली कांग्रेसको भागमा परेको कांग्रेसका एक नेताले बताएका छन् । उनका अनुसार नेपाली कांग्रेसले अर्थमन्त्रीका लागि प्रकाशशरण महतलाई पठाउने निर्णय गरेको हो ।
स्रोतका अनुसार चैत्र १५ गते (बुधबार) नै अर्थमन्त्रीका रुपमा डा. महतले सपथ लिने तयारी भइरहेको छ । ८ मन्त्रालयसहित नेपाली कांग्रेस सरकारमा जाने भएको हो ।
डा. महतले अमेरिकामा अर्थशास्त्र विद्यावारिधी गरिसकेका छन् । अर्थतन्त्रबारे राम्रो ज्ञान राखेका महत अर्थमन्त्री भएसँगै मुलुकको आर्थिक अवस्था र सेयरबजारमा पनि सकारात्मक प्रभाव पर्ने विश्वास गरिएको छ ।
