">
काठमाडौं । नेपाल धितोपत्र बोर्डका अध्यक्ष रमेश कुमार हमालले लगानीकर्ताको पीडामा बोर्ड खुसी नहुने बताएका छन् । सोमबार लगानीकर्तामार्फत १० बुँदे ज्ञापन पत्र बुझ्दै बोर्ड अध्यक्ष हमालले यस्तो बताएका हुन् ।
ज्ञापन पत्र बुझ्दै बोर्ड अध्यक्ष रमेश कुमार हमालले लगानीकर्ताका मागहरुप्रति बोर्ड सकारात्मक रहेको बताएका छन् । ‘बोर्ड लगानीकर्ताको अभिभावक हो र आफ्ना सन्तती अफ्ठ्यारोमा परेको अभिभावकले टुलुटुलु हेर्न सक्दैनन् ।’, अध्यक्ष हमालले भने, ‘तपाईहरुका मागप्रति बोर्ड सकारात्मक छ । थप अध्ययन गरी पूँजी बजार सुधार र लगानीकर्ताको माग सम्बोधन गर्नेतर्फ अग्रसर हुनेछु ।’
त्यस्तै, उनले हाल पूँजी बजारमा देखिएको अफ्ठ्यारोका विषयमा अर्थमन्त्रीसँग पनि एक चरणको छलफल गसिकेको बताएका छन् ।
‘अहिले सेयर बजारमा जुन खालको प्रेसर र नकरात्मक अवस्था देखिएको छ, यसका विषयमा अर्थमन्त्रीज्यूसँग पनि छलफल गरेको छु । उहाँ यी सबै विषयमा सकारात्मक नै हुनुहुन्छ ।’, अध्यक्ष हमालले भने, ‘हामी रेगुलेटरहरु पूँजी बजारको सुधारका सवालमा असल अभिभावक बन्ने प्रयासमा तत्पर छौँ ।’
