काठमाडौं । स्लोभाकिया पठाईदिन्छु भन्दै रकम ठगी गर्ने व्यक्ति पक्राउ परेका छन् । जिल्ला पाँचथर फाल्गुनन्द गाउँपालिका वडा नं.३ घर भई हाल लिलितपुर महानगरपालिका वडा नं. १४ नख्खीपोट बस्ने ४६ वर्षीय एकराज नेम्बाङ पक्राउ परेका हुन् ।
उनले विजय लिम्बुलाई वैदेशिक रोजगारीको लागि स्लोभाकिया जानको लागि प्रतिव्यक्ति १५ लाख लाग्ने र स्लोभाकियामा पुगेपछि कन्स्ट्रक्सन कम्पनीमा वेल्डिङको काम लगाइदिन्छु मासिक २ लाख भन्दा बढी तलव हुन्छ भनी विश्वास दिलाई प्रलोभनमा पारी पीडितबाट पटकपटक गरी जम्मा १२ लाख रकम लिई सम्पर्क विहीन भएको प्रहरीले जनएको छ ।
काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले नेम्बाङलाई चैत २८ गते गोंगबुबाट पक्राउ गरेको हो । पक्राउ परेका नेम्बाङलाई थप अनुसन्धान तथा कारवाहीको लागि वैदेशिक रोजगार विभाग बुद्धनगर पठाईएको प्रहरीले जनाएको छ ।
