काठमाडौँ । भुटानी शरणार्थी बनाई अमेरिका लैजाने भन्दै ठगी गर्ने गिरोह विरुद्ध थप १० जनाले जाहेरी दिएका छन् । नेपाली नागरिकलाई भुटानी शरणार्थी बनाई अमेरिका लैजान्छु भनी बिभिन्न किसिमका प्रलोभनमा पारी ठगी धन्दा चलाउँदै आएका सन्देश शर्मा, सानु भण्डारी र केशव दुलाललगायत विरुद्ध उजुरी परेको परेको हो ।
उनीहरु विरुद्ध कास्की, दाङ, मोरङ, रुकुम लगायत जिल्लाहरूका १० जना पीडितहरूले करिब ५ करोड १९ लाख ९७ हजार भन्दा बढी ठगी गरेको भन्दै काठमाडौँ उपत्यका अपराध अनुसन्धान कार्यलय १० वटा छुट्टा छुट्टै जाहेरी दिएका प्रवक्ता प्रहरी उपरीक्षक सोमेन्द्र सिंह राठौरले जानकारी दिए ।
प्रवक्ता राठौरका अनुसार उक्त सक्कल जाहेरी दरखास्त लगायतका कागजातहरू आवश्यक अनुसन्धान तथा कारबाहीको लागि जिल्ला प्रहरी परिसर टेकु पठाइएको छ । उनहिरुले सर्वसाधारणलाई २०७७ साल देखि ठगी गर्दै आएको पाइएको छ ।
